Ó am a bhunaithe, bhí an Comharchumann ag iarraidh tógáil a dhéanamh ar na hacmhainní nadúrtha sa cheantar agus an oiread deiseanna ioncaim agus fostaíochta ab fhéidir a thapú. Siar sna seascaidí, bhí béim ar leith ar thionscail na talmhaíochta agus na hiascaireachta agus bhí sé mar pholasaí díriú isteach ar riachtanais na n-iarrthóirí áitiúla. Ach tá scóip na heagraíochta leathnaithe amach ós na seachtóidí is na hochtóidí. Sa lá atá inniú ann, tá an earnáil oideachais agus oiliúna mar phríomh-mhargadh ag Comharchumann Forbartha Chorca Dhuibhne.

Léiriú é seo ar an athrú bunúsach atá tagtha ar gheilleagar na leithinse agus, go deimhin, ar an athrú atá tagtha ar fhormhór na Gaeltachta ar fuaid chósta an iarthair. Léiríonn sé chomh maith, go raibh an Comharchumann in ann na hathruithe seo a láimhseáil go héifeachtach agus straitéis an Chomharchumainn a chur in iúl do na deiseanna agus na riachtanais forbartha de réir mar a bhí athrú ag teacht ar an saol sóisialta agus eacnamaíoch. Tá príomhoifig Chomharchumann Forbartha Chorca Dhuibhne lonnaithe in Áras Bhréanainn i mBaile an Fheirtéaraigh. Faoi chúig chinn de fhochomhlachtaí a deintear imeachtaí ar fad an Chomharchumainn a reachtáil: Coláistí Chorca Dhuibhne, Oidhreacht Chorca Dhuibhne, Tobar Dhuibhne, Scéim SOLAS, agus Skillnet Teo.